Eyrarbakkahópurinn hefur innt alla frambjóðendur í væntanlegum bæjarstjórnarkosningum um afstöðu til skipulagsmála er varðar deiliskipulag fyrir Eyrarbakka sem er svo hljóðandi:
Frambjóðendur, hver er afstaða ykkar?
Það hefur verið stöðugt vaxandi ólga meðal strandbúa Árborgar með allt viðmót og þjónustu Árborgaryfirvalda við þá sem síendurtekið og árangurslítið hafa leitað sjálfsagðrar fyrirgreiðslu við að koma af stað byggingarframkvæmdum á Eyrarbakka og Stokkseyri.
Nú tók steininn úr við afgreiðslu nýja aðalskipulagsins, þegar bæjarstjórnarmeirihlutinn ?kom til móts við? mótmæli gegn skipulagsáformunum á Eyrarbakka með því að auka enn við vitleysuna sem verið var að mótmæla.
Eyrarbakki er langt og mjótt þorp, 2 km á lengd og 150-250 m á breidd. Íbúaþing á Eyrarbakka í upphafi undirbúnings fyrir nýtt aðalskipulag markaði afdráttarlaust þá stefnu að breikka þorpið um nálægt helming með íbúðabyggð norður að þjóðvegi og skapa þannig forsendur fyrir fullnýtingu svæðisins með því að skipuleggja það sem eina heild.
Tillaga skipulagsaðstandenda bæjarstjórnar um aðalskipulag sniðgekk algerlega þennan vilja Eyrbekkinga nema rétt málamyndaræmu ofan þorpsins, en gerði þess í stað ráð fyrir að lengja þorpið um 500 metra.
Þessu mótmæltu hálft fjórða hundrað íbúar. Brugðizt var við með annarri málamyndaræmu ofan þorpsins og enn frekari lengingu þess um 400 m.
Þannig er orðið við vilja Eyrbekkinga um breikkun þorpsins með því að lengja það úr 2 km í 3 km, og nýtingarmöguleikar svæðisins ofan þorpsins eru stórlega skertir til frambúðar með skipulagslausum afskurði þess.
Okkur Eyrbekkingunum fjörutíu sem sátum bæjarstjórnarfundina þegar skipulagið var samþykkt ofbauð leiksýning meirihlutafulltrúanna, þykjustan og rökleysurnar. En við skildum vel að forseti bæjarstjórnar skyldi í fundarbyrjun taka fram að hljóðupptökur væru bannaðar en myndatökur leyfðar. Þvílík sýndarmennska.
Minnihlutafulltrúarnir höfðu lagt fram tillögur um að verða við kröfum Eyrbekkinga að svo miklu leyti að það yrði ekki til að valda töfum á afgreiðslu aðalskipulagsins. Þessum tillögum var öllum sópað út af borðinu með friðþægingarbókun og blekkingarsamþykkt. (?slá út af laginu samþykkt?)
Flestum Eyrbekkingum er orðið bumbult af bæjarstjórninni við þessa reynslu og höfðu eins og aðrir strandbúar fengið sig fullsadda á því sem á undan var gengið.
Í bókun bæjarstjórnarmeirihlutans er vitnað til laga ?um reglubundna endurskoðun aðalskipulags á fjögurra ára fresti? og samþykktin lofar niðurstöðum ?tímanlega fyrir næstu lögboðna endurskoðun aðalskipulagsáætlunarinnar?.
Hér er út af fyrir sig ekki verið að ljúga, - og þó, en ekki beinlínis. En það er ekki rétt farið með.
Það er markvisst verið að biðla til þess skilnings, að aðalskipulag verði ekki til umfjöllunar fyrr en að fjórum árum liðnum. Með öðrum orðum muni aðalskipulag ekki koma til umfjöllunar hjá nýrri bæjarstjórn, sem tekur við eftir fimm mánuði.
Um reglubundna endurskoðun aðalskipulags segir hins vegar í skipulagslögum:
"Þegar að loknum sveitarstjórnarkosningum metur sveitarstjórn hvort ástæða sé til að endurskoða aðalskipulagið. Um málsmeðferð á endurskoðaðri áætlun fer sem um gerð nýs aðalskipulags væri að ræða." Óháð því hvernig blekkingum og óskhyggju núverandi meirihluta bæjarstjórnar Árborgar er háttað er þess vegna deginum ljósara, að eitt fyrsta verkefni hvers fulltrúa í nýrri bæjarstjórn á þessu vori verður að taka afstöðu til þess,
· hvort 357 mótmæli vegna skipulags Eyrarbakka hafi fengið raunverulega rökstudda umfjöllun og skynsamlega afgreiðslu,
· hvort rétt og skynsamlega hafi verið unnið að gerð þess aðalskipulags, sem nú er búið að samþykkja af meirihluta bæjarstjórnar,
· hvort aðalskipulagið, sem bíður staðfestingar ráðherra, sé skynsamlegt, ásættanlegt fyrir allan þorra bæjarbúa og taki tillit til þekktra óska íbúa um þeirra næsta nágrenni,
· "hvort ástæða sé til að endurskoða aðalskipulagið"
Um þetta allt verður talsvert fjallað nú á vordögum.
Framboðslistar eru að taka á sig mynd þessa dagana, hver listi með sínum hætti.
Allir strandbúar finna að bæjarstjórnarfulltrúar Samfylkingar og Framsóknar hafa á þessu kjörtímabili verið ansi samtaka um að bægja kjósendum þar frá sér. Margir, sem bera ábyrgð á þessum meirihluta, telja komið að skuldadögum. Bæjarfulltrúar þeirra voru allir sem einn samtaka að bæla niður mótmæli Eyrbekkinga. Það er hætt við að þeim hafi orðið það á með þeirri gerð að hleypa flokkadráttum í málið í óþökk þeirra sem mótmæltu á þeim grundvelli að gæta almennra hagsmuna þorpsins.
Orðspor dómgreindar þeirra hefur flekkast við þennan gerning, sem að vísu er gerður á samábyrgð þeirra, og oft er sagt að samábyrgð jafngildi engri ábyrgð. Ekki er ósennilegt, að áður en næstu fimm mánuðir verða liðnir hafi þeir flestir afneitað frumkvæði sínu og gert lítið úr atfylginu, enda mála sannast að einungis einn bæjarfulltrúi hafi komið að tilurð skipulagsins í þeim mæli að geta fjallað um það af yfirsýn.
Framundan er prófkjör Sjálfstæðismanna eftir rúman hálfan mánuð og fram kominn hálfur annar tugur frambjóðenda. Báðir núverandi bæjarfulltrúar þess flokks lögðu sig fram um að styðja kröfur Eyrbekkinga, en mættu í viðleitni sinni sömu óbilgirni og þröngsýni og íbúar á Eyrarbakka.
Það er enginn vafi á því, að þorri Eyrbekkinga mun í vor spyrja um afstöðu frambjóðenda allra flokka til endurskoðunar á aðalskipulaginu og þessar vikur bíða margir eftir að heyra afstöðu prófkjörsframbjóðenda. Einhverjir eru að velta fyrir sér hvort rétt sé að hafa áhrif á framboðið með prófkjörsatkvæði. Hugur manna stendur til þess að meta hvern frambjóðanda eftir afstöðu hans í þessu máli og flokka eftir afstöðu einstakra frambjóðenda, og menn verða varla látnir njóta þess vafa, sem þeir reyna að skapa sér með þögn og loðnum orðum.
Frambjóðendur, hafið þið kynnt ykkur málavexti þannig að þið getið tekið afstöðu til nýrrar endurskoðendur aðalskipulagsins og rætt málið af yfirsýn, og hver er þá afstaða ykkar?
Heimild: Brim.123.is
